"O PP de Pontevedra volve saír en informes e documentos relacionados
con pagamentos en B e cartos en sobres. Agora é a Intervención Xeral da
Administración do Estado quen pousou a lente sobre o Partido Popular
pontevedrés, segundo informa a Cadena Ser.
E faino para dar
''verosimilitude'' á versión de Luís Bárcenas sobre o pagamento de
cartos en B a Mariano Rajoy e Dolores de Cospedal en 2010.
Na declaración do 15 de xullo o ex-tesoureiro do PP afirmou que os
pagamentos en B continuaran máis aló de 2008 (ano no que acababan os
coñecidos como 'papeis de Bárcenas'). Referiuse a un embargo de 160.000
euros na conta da sede central popular por mor dunha débeda do PP de
Pontevedra.
Bárcenas afirmou que no ano 2010 recibiron 50.000 euros en
cartos en negro do PP de Pontevedra por esa débeda. Un diñeiro que se
entregou “en man e en sobres de cor marrón” a Mariano Rajoy e Dolores de
Cospedal. 25.000 euros para cada un, en sobres de 500 euros.
Como sinala a SER, o informe feito por Intervención acredita o dito
polo ex-tesoureiro do embargo de Pontevedra e que foi asumido pola sede
central do PP. Tamén acredita, tal e como afirmou o ex-tesoureiro, que o
PP pontevedrés non devolveu a débeda por “conduto oficial algún”.
As
fontes xurídicas consultadas pola cadea consideran que os dados do
informe dan “credibilidade” á versión de Bárcenas. Máis un indicia,
apuntan, aos xa existentes até agora sobre os pagamentos en B.
Aliás, o ex-xerente do PP Cristóbal Páez recoñeceu en agosto pasado
ante o xuíz a existencia do embargo pola débeda do PP de Pontevedra e
que eses cartos non chegaron por conduto oficial." (Sermos Galiza, 05/03/2014)
No hay comentarios:
Publicar un comentario