Dous xuices amenazaron a xuíza De Lara, instrutora da Pokemon

 Pilar de Lara, instructora do caso Pokemon

"Quen son os xuíces que atacan a De Lara e Vigilancia Aduanera?

 Preguntado por se o CGPJ debería tomar cartas no asunto, o decano do Consello da Avogacía de Galicia púxose, polo menos en parte, de parte da instrutora da Operación Pokemon e outras macrocausas contra a corrupción. Evaristo Nogueira mostrouse, en declaracións á Ser, partidario de que se aclare se houbo algún tipo de presión porque “isto non sería de recibo” nunha democracia. (...)

Os xuíces foco da polémica por atacar a súa compañeira -durante as conversas cun imputado por blanqueo de capitais- son Juan Carlos Carballal, titular do xulgado de instrución número 4 de Lugo, e  Fidel del Río, titular do xulgado de vixilancia penitenciaria número 2 de Galicia.

Juan Carlos Carballal aparece citado numerosas ocasións no sumario da Operación Pokemon en relación con dirixentes do PP, como a deputada Paula Prado, o seu irmán o avogado Luciano Prado e o ex-xefe de gabinete do Concello de Santiago  Ángel Espadas. Segundo publicou a Ser en primavera, Vigilancia Aduanera cre que este xuíz fixo de intermediario nun dos contratos públicos que presuntamente intentaba amañar Espadas en favor de Unika, filial de OHL. (...)

Foi a filtración do informe de Vigilancia Aduanera quen provocou as conversacións críticas contra De Lara, intervidas no marco doutro caso insturído en Madrid, conversas que agora saen a luz. En virtude desas escoitas, Vigilancia Aduanera pide que se investigue a estes maxistrados por presuntamente tentar meter presión aos investigadores e a xuíza De Lara.

Ao igual que Carballal, o xuíz Fidel del Río tamén ocupou no pasado espazo na prensa por  actuacións polémicas. En 2011, segundo El País, foi condenado por conducir borracho, retirándoselle o carné 10 meses. En 2008 Interviú cualificouno de “juez coladero” despois de que catro narcos franceses da mesma banda fugáranse sucesivamente.

As conversas publicadas non proveñen orixinalmente dun preito que instrúa a xuíza de Lugo. O maxistrado Eloy Velasco da Audiencia Nacional remitiu á titular do Xulgado de Instrución Número 1 de Lugo, o de Pilar de Lara, estas conversacións telefónicas.

Os citados xuíces falan  cun empresario investigado, Juan Castro García, condenado noutro preito en Pontevedra canda dous funcionarios de Aduanas e outro empresario por fraude na venta de gasóleo. Castro García tiña o teléfono pinchado por orde xudicial.  (...)"                (Galicia Confidencial, 11/01/17)


"Baltasar Garzón pide “protección fronte aos ataques” para a xuíza Pilar de Lara.

 O xurista Baltasar Garzón criticou este mércores as presións sobre a titular do Xulgado de Instrución Número 1 de Lugo, Pilar de Lara Cifuentes, que instrúe macrocausas como a 'Pokémon' e a 'Carioca', ao tempo que defendeu a necesidade de "protección fronte aos ataques".

Así o manifestou nunha entrevista na Radio Galega, na que considerou, en relación á dilatación das causas que instrúe esta, que a xuíza Pilar de Lara "ten que ter un reforzo de medios para que poida atender o seu traballo", pero tamén reivindicou "unha protección fronte a eses ataques que está a recibir".

Neste sentido, o ex-maxistrado da Audiencia Nacional considerou que esas críticas á xuíza buscan, ao seu entender, influír nas causas que instrúe Pilar de Lara Cifuentes no seu xulgado.

Garzón recordou tamén as presións que viviu na súa propia persoa e que acabaron coa súa inhabilitación por once anos. "É o canon que se ten que pagar por ser independente. Non me arrepinto, asumo o que sucedeu e tomo enerxía para seguir adiante", comentou. (...)"         (Galicia Confidencial, 11/01/17)


"Todas as forzas con representación na Cámara galega (PPdeG, En Marea, PSdeG e BNG) coincidiron este martes en defender que a Xustiza debe actuar con "eficacia" e "axilidade", co fin de non prolongar "eternamente" as instrucións para que se cumpra coas garantías dos investigados e, ao tempo, evitar "facilidades" para a anulación dos procesos.

O debate chegou ao Pazo do Hórreo a raíz dun informe de Vixilancia Aduaneira, no que dous maxistrados de Galicia descualifican a Pilar de Lara así como esa entidade que participa en investigacións da xuíza de Lugo, ligada a varias 'macrocausas' que investigan supostos de corrupción na comunidade tales como as operacións Pokémon e Cóndor.

Nas conversacións intervidas incluídas no informe, recollido por Europa Press e adiantado este martes pola Cadena Ser, un xuíz galego descualifica, cando fala cun empresario investigado por branqueo, o traballo da xuíza. De feito, un dos maxistrados di ao seu interlocutor que "a xuíza De Lara está tola perdida".

"Non son a persoa adecuada para falar de cuestións sub iudice", replicou, preguntado ao respecto, o voceiro parlamentario do PPdeG, Pedro Puy, quen, ademais de asegurar que descoñece a cuestión, aludiu á "división de poderes" antes de subliñar que, dende o Lexislativo, é "particularmente oportuno ser respectuoso co poder xudicial, que fala fundamentalmente a través de sentenzas".

"Non teño ningunha opinión sobre esa información que sexa digna de ser feita pública", esgrimiu o dirixente popular, quen, en todo caso, apelou dende unha perspectiva máis xeral ao "vello aforismo de que unha xustiza lenta non é xusta", cuestión que ve "aplicable a este ou a calquera outro caso no que se alonguen os procesos de instrución".

Engadiu que a opinión de que é preciso axilizar as instrucións é "compartida por todos" e mesmo a defendeu o presidente do Tribunal Superior de Xustiza de Galicia (TSXG), Miguel Ángel Cadenas.

"NON DEBERÍA DAR LUGAR A SANCIÓN"

O seu homólogo no grupo de En Marea, Luís Villares, procedente do ámbito xudicial, si entrou no fondo da cuestión ao manifestar que considera que "as conversacións do ámbito privado que realicen dous maxistrados é algo que non debería dar lugar a ningún tipo de sanción", toda vez que "o exercicio da crítica" ás resolucións xudiciais ou a unha forma de actuación dun xuíz "forma parte do debate público".

"Non creo que mereza ningunha sanción", insistiu, para engadir que, dende unha perspectiva máis xeral e como xa manifestou noutras ocasións na súa faceta previa de voceiro de Xuíces para a Democracia, "as instrucións non poden durar eternamente". Ao seu xuízo, é "inaceptable" que unha instrución "dure cinco anos".

Ao respecto, apuntou que "ás veces faltan medios" para que os maxistrados poidan facer "ben o seu traballo" e subliñou que conseguir determinadas probas (como unha análise de ADN ou dun correo electrónico) pode levar "meses", se ben engadiu que a lei de axuizamento criminal prové vías para evitar atrasos, como a posibilidade das pezas separadas, e exemplificou coa instrución do Caso Palma Arena. Así, insistiu en que tan necesario é "tirar do fío" como "trocealo" cando se esixe.

O que, ao seu entender, non é "normal" é que haxa xulgados "con atrasos anormais de forma sistemática" como consecuencia "da súa forma de instruír". Para Villares, é preciso "corrixir" esta "anomalía", posto que a "duración indefinida" dunha instrución é "inaceptable" dende o punto de vista das persoas investigadas e, ademais, "facilita" que un proceso sexa anulado.

Ante a insistencia de se debería investigarse se hai presións sobre De Lara, o voceiro de En Marea reafirmouse na súa intención de non se pronunciar sobre "conversacións particulares".

EVITAR DETERMINADOS "EPISODIOS" NA XUSTIZA

O socialista Xoaquín Fernández Leiceaga, pola súa banda, reivindicou o funcionamento "dilixente, eficaz e correcto" do Poder Xudicial como "elemento básico" do Estado de Dereito.

Fíxoo antes de lamentar "episodios" como o publicado este martes en relación a De Lara, que "poñen en cuestión dende dentro" o funcionamento das institucións e "non contribúen para nada" a avanzar nunha "democracia máis xusta" na que "os dereitos dos cidadáns estean máis seguros".

"Todos deberían facer un esforzo para que o Poder Xudicial non só funcione máis eficazmente, senón que reforce a súa lexitimidade a ollos dos cidadáns. Non se trata de que a Xustiza sexa eficaz, senón que tamén parézao. Estes episodios non son nada edificantes", resolveu.

"AXILIDADE" E ACLARAR SE HAI PRESIÓNS

A voceiro parlamentaria do BNG, Ana Pontón, incidiu en que "a Xustiza que ás veces actúa non é neutra nin cega" e lamentou que haxa casos xudiciais "con sumarios abertos que non se finalizan e grandes operacións mediáticas que non chegan a ningunha conclusión, onde parece que pode haber persoas que teñen unha mancha pero que a Xustiza non acaba resolvendo".

Por iso, pediu "dotación, rapidez e axilidade" na Xustiza e que se aclare "se hai algunha presión" porque, que a haxa, "non sería de recibo". "Pero tampouco é de recibo que haxa grandes operacións abertas durante 10 anos sen conclusión. Iso non é Xustiza, é sementar dúbidas acerca de todo o mundo", remarcou.

Por último, sinalou que en España hai "moitos exemplos" de Xustiza que "actúa ao ditado ou de forma moi paralela aos intereses de certas formacións política", e manifestou de que se produza unha "reforma" que garanta a independencia xudicial, "unha materia pendente, como outras moitas, no réxime xurdido do ano 78".

"Hai moitos pasos que dar para que a Xustiza funcionase de forma independente", resolveu."        (Galicia Confidencial, 10/01/17)